Ei plan coneishuda era tradicion camparolaire de Catalonha. Es misharnons son ingredients imprescindibles ena preparacion de fòrça des nòsti plats; en bèri uns ne son eth compausant principau o, tanplan, er unic.
Aguesta consomacion ei se tròbe ena origina d'un comèrç important, tant de misharnons que creishen espontanèaments enes bòsqui, quan n'ei era sason, coma des cultivadi.
Mès er interès des catalans pes misharnons non se limite a ues qüesions gastronomiques o comerciaus. Egauments importants, o dilhèu mès, son es aspèctes ludics o esportius, que fan que, en tot arribar es ploges dera tardor, un gran nombre de persones se desplacen tàs bòsqui damb era idèa de passar ua estona de léser e d'aumplir de misharnons es sòns tistèrs.
Era flòra micologica deth nòste país includís, totun, espècies toxiques, bères ues fòrça perilhoses. Eth desconeishement e era confusion damb espècies comestibles d'aspècte semblable, hèn que cada an, en arribar era sason des misharnons, se produsisquen intoxicacions, bères ues mortaus quitaments.
Tipes de misharnons
Es misharnons son es còssi fructifèrs de bèri fongs, que se formen a compdar deth micèli, lèu tostemp en contacte damb er exterior. Es fongs transformen es rèstes de matèria organica d'animaus e plantes en substàncies profitables pes vegetaus.
Ath delà, es micèlis des fongs hèn part dera estructura deth solèr, qu'ei eth supòrt imprescindible entath desvolopament dera vida vegetau e, per extension, de quinsevolhe tipe de vida.
I a diuèrses espècies de misharnons, bères ues son toxiques e bères ues comestibles, mès era majoritat de misharnons non an interès culinari.
Se coneish damb eth nòm de misharnons, en generau, era part aeriana e visibla des fongs, era quau a per mission era creacion e difusion des espòres, que son es elements que permeteràn era reproduccion dera espècia.
Es misharnons son de mesures fòrça diuèrses: bèri uns lèu non son visibles a uelh nud, deth temps que d'auti pòden arribar a mesurar mès de miei mètre, coma bèri "pets de lop" gigants.
Presenten formes fòrça variades, qu'arrebremben un paraploja, un embut, ua maça o un coralh; n'i a de forma aplanada, coma un boton, o esferica, coma ua pilòta.
Pòden auer colors fòrça diuèrsi, a viatges fòrça atractius.
AMONTParts d'un misharnon
Entara corrècta identificacion des misharnons cau examinar atentaments es sues diferentes parts. En cas des amanites e espècies d'aspècte semblable, ei important verificar era preséncia dera vòlva qu'a viatges demore boçada pera huelharaca.
Non toti es misharnons compden damb totes es parts indicades en aguest esquèma; i a fòrça espècies que non an vòlva ne anèth e d'autes non an lames. N'i a tanben damb formes fòrça desparières as indicades.
Atau, per exemple, es camparòus an anèth, mès non vòlva; es rovelhons e es russules daurades o grisetes non an ne anèth ne vòlva; es ceps non an lames, mès tuèus. En çò que tanh ara forma, es pès d'arrat son plan diferenti dera majoritat de misharnons, damb eth sòn aspècte corallin.
Cau examinar atentaments es caracteristiques morfologiques des misharnons entà poder-ne identificar corrèctaments es espècies.
